1. januar 2004 blei Senter for statleg økonomistyring (SSØ) etablert som eit forvaltingsorgan underlagt Finansdepartementet. Verksemda endra namn til Direktoratet for økonomistyring (DFØ) 14. november 2011. DFØ har som oppgåve å styrkje den statlege økonomistyringa og forbetre ressursutnyttinga på området.
DFØ er rådgivar for sentrale myndigheiter innanfor statleg økonomistyring og utfører forvaltingsoppgåver for alle statlege verksemder. Hovudoppgåvene til DFØ er å forvalte og formidle kunnskap om etterleving av økonomiregelverket i staten, forvalte konsernsystema for statsrekneskapen og statens konsernkontoordning og levere økonomitenester, inkludert lønns- og rekneskapstenester, til om lag 70 prosent av dei statlege verksemdene. DFØ har òg som oppgåve å gjennomføre analysar og utgreiingar som skal danne grunnlag for å utvikle statleg styring.
DFØ er organisert i følgjande avdelingar: forvaltings- og analyseavdelinga (som dette oppdraget er knytt til), rekneskapsavdelinga, lønnsavdelinga, IT-avdelinga og stabsavdelinga. Til saman har DFØ om lag 370 tilsette.
Meir informasjon om DFØ og organisasjonen vår finn du på www.dfo.no.
DFØ skal arrangere to heildagskonferanser: Styringskonferansen 2017 og Styringskonferansen 2018. Desse konferansane skal vere i Oslo, og lokala skal vere i gåavstand frå Oslo sentrum.
Konferanselokalet må kunne ta imot minst 700 deltakarar samtidig i ein plenumssal. Vi ønskjer (helst) skoleoppsett i plenumssalen. Konferansane vil berre ha plenumssesjonar – truleg mellom åtte og tolv innslag av varierande lengd og innhald. Det må vere plass til eitt sett med standar utanfor plenumssalen – truleg mellom fem og sju standar. Straum må vere tilgjengeleg for alle standane.
Konferansane vil vare frå klokka 08.00 til klokka 20.00. Det vil vere nødvendig med rigging og hjelp til rigging på dagtid ein dag før konferansen, eller eventuelt om ettermiddagen, frå klokka 16.00 til klokka 21.00, og nedrigging frå ca. klokka 18.00–20.00 på arrangementsdagen. Nok mannskap til å rigge stolar, bord, standar, innsjekking o.a. må vere tilgjengeleg.
Profesjonelt personell og utstyr for lyd og bilete, inkludert opplegg for filming, må vere tilgjengeleg under rigginga og under sjølve konferansen.
Vi ønskjer at design av lokale med blomar, TV-skjermar for å vise løpande presentasjonar med meir skal vere inkludert.
Servering: kaffi, te og vatn til pausar, frukt om morgonen, lunsj til alle deltakarar, snittar/rundstykke tidleg på ettermiddagen og ståande buffet med fingermat til om lag 400 deltakarar på sein ettermiddag.
Vi ønskjer òg hjelp knytt til gjennomføring av lyd-/biletdrift under konferansen og ei oversikt over miljøprofilen til leverandøren.